ຄວາມຮັກທີ່ຊ້ອນຢູ່

ลำดับตอนที่ #2 : ບຸນວັດບ້ານເຮົາ

..........  18 : 30 ' ..........

     “ ມົດ “ ສຽງແຈັກຮ້ອງຢູ່ໜ້າບ້ານ

     “ ສິດມາໜ້າບ້ານນະລູກໄປໄຂປະຕູດຸ ລະຊວນສິດມາກິນເຂົ້ານຳແດ່ “      ແມ່ບອກກ່ອນທີ່ຂ້ອຍຈະແລ່ນໄປໄຂປະຕູໃຫ້ສິດ

     “ ພໍດີກຳລັງກິນເຂົ້າ ເຂົ້າໄປໃນກ່ອນ “ ຂ້ອຍອອກໄປໄຂປະຕູໃຫ້ສິດ

     “ ອ້າວ ! ສິດ ມາກິນເຂົ້ານຳແມ່ກ່ອນລູກ “

     “ ລູກກິນແລ້ວແມ່ , ພໍດີວ່າມື້ນີ້ເຂົາເຈົ້າເຮັດບຸນຫາລາຍໄດ້ຢູ່ວັດ ເລີຍຊິພາມົດໄປຫຼິ້ນ ໄດ້ຍິນວ່າມີໜັງກາງແປນນຳ “

     “ ໄປກະໄປຕົວະລູກດຽວກິນເຂົ້າແລ້ວລະກະພາກັນໄປ,​  ລະນ້ອງໂຕບໍ່ໄປນຳຫວາ “ ແມ່ວ່າ

     “ ລາຍນັ້ນໄດ້ເກມໃໝ່ລະບໍ່ໄປໃສດອກ ” ສິດຍີ້ມກ່ອນຈະຕອບ  

     “ ເຮົາອີ່ມແລ້ວ “ 

     “ ວ່າແຕ່ໝູ່ມາຊວນນິອີ່ມໂລດເນາະ, ຢ່າພາກັນກັບເດິກຫຼາຍເດີ້ “ ພໍ່ວ່າ

     “ ໂດຍດຽວຖ້າເບີ່ງໜັງຈົບລະລູກກະຊິກັບເລີຍ ຊຶມາສົ່ງມົດຮອດເຮືອນ “ ສິດຕອບພໍ່

     “ ເວົ້າປານເຮືອນເພີ່ນຢູ່ໄກແທ້ໄກວ່າເນາະສິດ ຢູ່ຂ້າງໆກັນນິໜື່ງ “ ຂ້ອຍເວົ້າພ້ອມຍ່າງໄປເອົາກະເປົາພາຍ

     “ ຄືສິດວ່າຫັ່ນຖືກແລ້ວ ຝາກເບີ່ງມົດມັນແດ່ຢ່າໃຫ້ມັນຕີກັບໃຜມາອີກເດີ້ “ ແມ່ສັ່ງ

     “ ແມ່ນະ ! ຄັນຖ້າເຂົາເຈົ້າບໍ່ມາຫາເລື່ອງເຮົາກ່ອນເຮົາກະບໍ່ຕີກັບເຂົາເຈົ້າດອກ “

     “ ຮີບໄປເທາະລູກມັນຊິເດິກ ໜັງເຂົາຊິຈົບກ່ອນ “ ພໍ່ວ່າ

     “ ໂດຍ ລະລູກຊິຟ້າວກັບ “ 

     

     ແລ້ວຂ້ອຍກໍ່ຢ່າງອອກມາກັບສິດ ແຕ່ຊິວ່າໄປແລ້ວຂ້ອຍມີເລື່ອງກັບນັກເລັງແຖວວັດກະຕັ້ງແຕ່ 2 ປີກ່ອນທີ່ພໍ່ພາມາບຸນວັດ ກັບ ສິດ ແຕ່ຕອນນັ້ນຄົນທີ່ຖືກຕີບໍ່ແມ່ນຂ້ອຍ ແຕ່ແມ່ນສິດຕ່າງຫາກເພາະບໍ່ໃສ່ແວ່ນຕາເລີຍຍ່າງໄປຢຽບຕີນພວກນັ້ນ ຄົນທີ່ເຂົ້າໄປຊ່ວຍກໍ່ແມ່ນຂ້ອຍພິ

     “ ເຮົາຊິເຮັດຫຍັງກ່ອນດີ “ ສິດຫັນໜ້າມາຖາມຂ້ອຍ ຂະນະທີ່ພວກເຮົາມາຮອດວັດແລ້ວ

     

     “ ລະໜັງສາຍຈັກໂມງ “

     “ 7 ໂມງເຄີ່ງ “

     “ ຊັ່ນ ເຮົາໄປຍິງປືນເອົານ້ຳຈັກແກ໋ດໜື່ງເມືອ “

     “ ໄດ້ ລະໃຜຊິແບກເມືອ “

     “ ກະເພີ່ນຫັ່ນລະແບກ ເພີ່ນເປັນຜູ້ຊາຍ “

     “ ລະນ້ຳຂອງໃຜ ? “

     “ ກະຂອງເຂົາ ເພີ່ນນິບໍ່ເຂົ້າໃຈຫຍັງ ຍັງຊິມາຖາມຢູ່ ໄປ໋ໄປເສຍເວລາ “ 

     ຕົກລົງກັນໄດ້ຂ້ອຍກໍ່ດຶງແຂນສິດ ໄປຍິງປຶນເອົານ້ຳເອົາຕຸກກະຕາ ໄປຊັດປຸ້ມເປົ້າ ຈົນເຈົ້າຂອງຮ້ານໄລ່ໜີ ໄປກິນລູກຊີ້ນກິນຕຳໝາກຮຸ່ງຮ້ານນັ້ນຮ້ານນີ້ ຈົນຕອນນິຂ້ອຍເລີ່ມຢ່າງບໍ່ໄຫວລະອີ່ມແຮງ

     “ ໄປຖ່າຍຮູບສະຕິກເກີ້ບໍ່ ລະຈື່ງເຂົ້າໄປເບີ່ງໜັງ “ ສິດຍັງຊວນລະຍີ້ມໃຫ້ຂ້ອຍແບບໜ້າຊື່ນຕາບານ ມັນບໍ່ເມື່ອຍແດ່ຫວາເກາະ ຂ້ອຍຢ່າງຂາຊິລາກໄປລະ

     “ ອື່ມ ໄປກະໄປ ແຕ່ເພີ່ນຈ່າຍເດີ້ “

   

     “ ຈ່າຍກະໄດ້ຊິເປັນຫຍັງ “ ສິດຍີ້ມກ່ອນຈະຕອບຄຳຖາມ ເປັນຫຍັງຕ້ອງຍີ້ມລະຈື່ງຕອບນຳຫວະ

     ລະຂ້ອຍກໍ່ລາກແຂນສິດໄປຮ້ານຖ່າຍຮູບ ຂອຍກະສົງໄສຢູ່ ວ່າງກີ້ນີ້ສິດເປັນຄົນຊວນຂ້ອຍແຕ່ຂ້ອຍພັດເປັນຕົນລາກສິດໄປພໍແຕ່ໄດ້ຍິນວ່າສິດເປັນຄົນຈ່າຍ ໃຫ້ມັນໄດ້ຈັ່ງຊິລະ

     “ ເອົາຂອບນິເບາະ ມີຮູບດອກໄມ້ລະກະມີຫົວໃຈນຳ “ ສິດແນະນຳຂະນະທີ່ເລືອກຂອບຮູບຢູ່

     “ ບໍ່,​ ຕ້ອງເອົາຮູບນິມັນມີໝວກມີປືນນຳເທ້ດີ 55555+ “ 

     ເຮົາສອງຄົນກໍ່ເລືອກຂອບຮູບທີ່ມັນມີຫຼາຍກະດໍ້ ແລະ ກໍ່ເຂົ້າໄປຖ່າຍຮູບເຮັດທ່ານັ້ນທ່ານີ້ຈົນໄດ້ຮູບຕັ້ງ 20 ປາຍໃບ

     “ ອ໋ະ ! ແບ່ງກັນ “ ຂ້ອຍຈັດການແບ່ງຮູບໃຫ້ສິດ

     “ ຂອບໃຈ “

     “ ບໍ່ເປັນຫຍັງ ຮູບເຂົາຂີ້ຮ້າຍເຂົ້າໃຫ້ເພີ່ນໝົດເລີຍ ອິອິອິ“

     “ ຮູບໃດເພີ່ນກະຂີ້ຮ້າຍໝົດຫັ່ນລະ “ ສິດເວົ້າລະອົມຍີ້ມ ມັນເປັນຕາໜ້າພູມໃຈບ່ອນໃດຫ໋ະ

     “ ກີ້ນິເວົ້າຫຍັງຫ໋ະ ເຂົາໄດ້ຍິນໃດ ຢາກມີເລື່ອງແມ່ນບໍ່ “

     “ ໂອ໋ຍ ! ເຈັບໆ ສິດຂໍໂທດສິດເວົ້າຍອກຊື່ໆ ໂອ໋ຍ “ 

      ຂ້ອຍໄດ້ແຕ່ບິດແອວສິດ ເພາະວ່າຖ້າຊິຢື້ໄປບິດຫູສິດກະຄືຊິຮູ້ໂຕກ່ອນ ເບີ່ງຈາກຂະໜາດໂຕຂ້ອຍກັບສິດມັນຂ້ອນຂ້າງຈະລຳບາກແກ່ການທີ່ຂ້ອຍຊິຢື້ແຂນໄປ 183 ກັບ 156 T_T ຊິວ່າໄປແລ້ວຂ້ອຍກໍ່ເປັນຜູ້ຍິງໂຕນ້ອຍໆຄົນໜື່ງທີ່ບໍ່ມີພິດສົງໃດໆ

     “ ໄປເບີ່ງໜັງດີກວ່າບໍ່ຢາກສົນທະນາກັບພວກໜ້າຕາດີ “  ຂ້ອຍເຮັດໄດ້ແຕ່ໜ້າບູດໃສ່ສິດ

     “ ສິດຂໍໂທດ ຢ່າເຮັດໜ້າແບບນິໃສ່ສິດ ຮູ້ບໍ່ຕອນທີ່ມົດຍີ້ມນະໜ້າຮັກກວ່າຕອນເຮັດໜ້າບູດອີກ ແຕ່ຕອນເຮັດໜ້າປົກກະຕິກະຍັງໜ້າຮັກ ແຮງຍີ້ມແຮງໜ້າຮັກຂື້ນເປັນກອງ ສິດມັກເວລາທີ່ມັດຍິ້ມຮູ້ບໍ່ “

     

     ກະບໍ່ປະຕິເສດດອກວ່າໂຕເອງບ້າຍ້ອງ ແຕ່ຄຳທີ່ສິດມັນເວົ້າກະອົດຍີ້ມບໍ່ໄດ້  ກະຕ້ອງໄດ້ຍີ້ມໃຫ້ມັນຄືເກົ່າ

     “ ຍີ້ມກະໄດ້ ລະຊິໄປເບີ່ງໜັງໄດ້ລະຫວາ “

     ແລ້ວສິດກໍ່ດຶງແຂນຂ້ອຍເຂົ້າໄປທີ່ເດີ່ນໂຮງໜັງທີ່ເຂົາເຈົ້າເອົາຜ້າແອ້ມໄວ້ ຖຶງຈະບໍ່ມີຕັ່ງໃຫ້ນັ່ງແຕ່ກະຍັງດີທີ່ມີສາດ ມັນກໍ່ແປກໄປອີກແບບໜື່ງເກີດມາຍັງບໍ່ເຄີຍເບີ່ງໜັງກາງແປນ, ທີ່ເຂົາເຈົ້າຮ້ອງວ່າໜັງກາງແປນ ສົງໄສວ່າອາດເປັນຍ້ອນວ່າສາຍໜັງຢູ່ເດີ່ນທີ່ມັນແປນຕິ , ເບິ່ງໄປແລ້ວກໍ່ຄືກັນກັບສາຍ Projector ຂະໜາດໃຫຍ່, ໜັງທີ່ເອົາມາສາຍກໍ່ເປັນໜັງສະໄໝກ່ອນ ສົງໄສສະແດງສະໄໝ ພໍ່-ແມ່ ຂ້ອຍເປັນສາວຢູ່ບໍ່ຊັ້ນກໍ່ເກົ່າກ່ອນຫັ່ນ ເບີ່ງຈາກຟີມ . ຂ້ອຍກໍ່ນັ່ງເບີ່ງໜັງໄປກິນຂົ້ວຖົ່ວດິນໄປ ແຕ່ເບີ່ງໄປເບີ່ງມາຕາຂ້ອຍມັນກໍ່ມືນບໍ່ຂື້ນແລ້ວ ' ໃຫ້ມັນໄດ້ຈັ່ງຊິລະ ' ເສຍເງິນຊື້ປີ້ມາເບີ່ງລະ ແຕ່ກະຢ່າເທາະບໍ່ແມ່ນເງິນເຮົາ ອິອິ

' Sit '

 

.................. 21 : 02' ......................

     ຂ້ອຍຫັນໄປເບີ່ງຄົນທີ່ນອນເອື່ອຍຢູ່ຂ້າງໆຂ້ອຍ ແມ່ນແລ້ວມົດນອນຫຼັບໂດຍທີ່ບໍ່ຮູ້ວ່າ ໜັງກາງແປນທີ່ພາກັນນັ່ງເບີ່ງຢູ່ນັ້ນສາຍຮອດໃສ , ສ່ວນຂ້ອຍກໍ່ໄດ້ແຕ່ນັ່ງເປັນໂຊຟາໃຫ້ຄົນໂຕນ້ອຍໆ ໝູນ , ຂ້ອຍມັກທີ່ຈະແນມເບິ່ງໃບໜ້າທີ່ມົນກ້ຽງ ບໍ່ມີແມ່ນແຕ່ຮອຍແປ້ວ ຫຼື ຮອຍສິວ , ໃບໜ້າທີ່ບໍ່ມີແມ່ນແຕ່ເຄື່ອງສຳອາງຕິດຢູ່ , ຂ້ອຍໃຊ້ມື້ອີກຂ້າງໜື່ງທີ່ລາວບໍ່ໄດ້ໝູນປັດຜົມທີ່ປົກໜ້າລາວອອກ ມັນເຮັດໃຫ້ຂ້ອຍໄດ້ເຫັນໜ້າລາວຊັດເຈນຂື້ນ , ແກ້ມທີ່ເປັນພວງ, ຄິ້ວດົກໆ ແລະ ຮີມສົບທີ່ເອີບອີ່ມ , ຂ້ອຍມີຄວາມສຸກທີ່ໄດ້ເບີ່ງໃບໜ້າແບບນີ້ໃນທຸກວັນ ໃບໜ້າທີ່ເຕັມໄປດ້ວຍຮອຍຍີ້ມຂ້ອຍບໍ່ອາດຈະລະສາຍຕາໄປຈາກລາວ ໜັງກາງແປນທີ່ຊື້ປີ້ເຂົ້າມາເບີ່ງ ທີ່ຈິງຂ້ອຍເບີ່ງໄດ້ບໍ່ຮອດເຄີ່ງເລື່ອງ ແຕ່ຂ້ອຍກໍ່ບໍ່ໄດ້ເສຍດາຍເງິນແມ່ນແຕ່ໜ້ອຍ ຂ້ອຍຢາກຈະໃຫ້ໜັງສາຍໄປດົນໆ ຂ້ອຍຈື່ງຈະໄດ້ມີເວລານັ່ງເບີ່ງໜ້າລາວໄປດົນໆ . ໃນໃຈກໍ່ໄດ້ແຕ່ຄິດວ່າມື້ໃດມື້ໜື່ງ ຂ້ອຍຈະສາມາດບອກຮັກລາວໄດ້ຢ່າງເຕັມປາກເຕັມຄຳ ໂດຍທີ່ບໍ່ຕ້ອງເສຍລາວໄປ ເພາະຄຳວ່າໝູ່ເປັນສິ່ງທີ່ຂີດເສັ້ນໄວ້ບໍ່ໃຫ້ຂ້ອຍຂ້າມໄປ ໃຈໜື່ງກໍ່ຄິດວ່າຖ້າເຮົາບໍ່ເປັນໝູ່ກັນໃນມື້​ນັ້ນ ຂ້ອຍອາດຈະສາມາດບອກຮັກລາວໃນມື້ນີ້ກໍ່ເປັນໄດ້ .

      ທຸກສິ່ງທຸກຢ່າງມັນເລີ່ມຈາກຕອນນັ້ນ ຕັ້ງຂ້ອຍ 4 ປີ ຕັ້ງແຕ່ຮຽນອະນຸບານ ຂ້ອຍກຳລັງຖືກເດັກນ້ອຍຄົນອື່ນຍາດເຂົາໜົມຢູ່,​ ຂ້ອຍຖືກເດັກນ້ອຍ 2-3 ຄົນຫຸ້ມຕີ ແລ້ວກໍ່ມີເດັກຜູ້ຍິ່ງຄົນໜື່ງມາຊ່ວຍ ເດົາໄດ້ງ່າຍໆເລີຍວ່າແມ່ນໃຜ 'ມົດ' ໃຈບໍ່ໄດມົດຄືຊື່ເລີຍ ເປັນຜູ້ຍິງທີ່ປີກກ້າຂາແຂງໄປທ້າຕີທ້າຕ່ອຍກັບຜູ້ຊາຍ , ທີ່ຈິງຂ້ອຍບໍ່ແມ່ນຜູ້ຊາຍທີ່ອ່ອນແອຄື ມົດຄິດ ແຕ່ຂ້ອຍມັກທີ່ຈະອ່ອນໃຫ້ມົດຍູ່ສະເໝີ .

     “ ຜູ້ບ່າວ ! ຜູ້ບ່າວ ໜັງໝົດແລ້ວເຂົາເຈົ້າເລີກໝົດລະໃດ “

     ຂ້ອຍມືນຕາເບີ່ງຜູ້ຍິງທີ່ຂາຍປີ້ໜັງກຳລັງປຸກ, ຂ້ອຍຫຼັບໄປຕອນໃດກໍ່ບໍ່ຮູ້ ຫຼັບໃນທ່ານັ່ງເປັນໂຊຟາແບບນິ ແລະ ແນ່ນອນ ຄົນທີ່ຢູ່ຂ້າງໆຂ້ອຍຍັງບໍ່ຮູ້ເມື່ອ

     “ ຂອບໃຈເດີ້ເອື້ອຍ ເຮົາຫຼັບໄປຕອນໃດບໍ່ຮູ້ “

     “ ເອີ້ ! ບໍ່ເປັນຫຍັງເຂົາເຈົ້າຫາກໍ່ເລີກ , ເອື້ອຍເຫັນໂຕກັບແຟນນອນຫຼັບແຕ່ດົນແລ້ວ ພາແຟນເຈົ້າເມືອສາມັນເດິກແລ້ວ “

     “ ໂດຍໆ ຂອບໃຈເດີ້ເອື້ອຍ “ ແລ້ວເອື້ອຍລາວກໍ່ຢ່າງໄປ

     ແຟນຫວາ  ຂ້ອຍນັ່ງຍີ້ມກັບຄຳນິກ່ອນຈະຫັນໄປປຸກຄົນຂ້າງໆ

     “ ມົດ ! ມົດ ! ໜັງຈົບແລ້ວ ໄປ໋ເມືອ “

     “ ຫຶ ! ບໍຟ້າວນ່າແມະ ເຮົາຂໍນອນອີກແປ໋ບໜື່ງ “

     “ ສິດໃດ ບໍ່ແມ່ນແມ່ ກັບໄປນອນຕໍ່ຢູ່ເຮືອນໄປ “

     “ ແມະເຮົາຢາກກິນປາໜື້ງ !@#$#$#!$%%$%!%^%&%&&^*@%&!%& “

     ຂ້ອຍກໍ່ອົດທີ່ຈະຍີ້ມອອກມາບໍ່ໄດ້ , ຂະໜາດລະເມີກະຍັງເປັນແນວກິນ ພາສາທີ່ເວົ້າກະຈັບໃຈຄວາມບໍ່ໄດ້ ເຂົ້າໃຈແຕ່ວ່າປາໜື້ງ , ລະຊິກັບຈັ່ງໃດໜິ ສົ່ງໃສຂ້ອຍຕ້ອງເປັນຄົນແບກກັບລະ

     

     “ ມົດເຂົາເຈ່ຍເພີ່ນກັບເດີ້ “

     “ອື່ “     ຕອບຂ້ອຍໄດ້ເສີຍຂະໜາດບໍ່ມືນຕາ

     ວ່າແລ້ວຂ້ອຍກໍ່ດຶງຮ່າງນ້ອຍໆພາດໃສ່ຫຼັງ , ຍອມຮັບວ່າໂຕນ້ອຍໆແຕ່ກໍ່ໜັກບໍ່ແມ່ນຂອງຄ່ອຍ ລະຂ້ອຍກໍ່ຕ້ອງແບກມົດ ແລະ ຖົງເຄື່ອງສຳພາລະສາລະພັດແນວກິນ ດ້ວຍຄວາມທຸລັກທຸເລ .

     

     ແຕ່ວ່າຂ້ອຍພັດມີຄວາມສຸກໃດທີ່ໄດ້ເຮັດແບບນີ້ ມັນເຮັດໃຫ້ຂ້ອຍໄດ້ໃຊ້ເວລາຢູ່ໃກ້ກັບລາວຫຼາຍຂື້ນ ຄົນແຖວບ້ານກໍພາກັນທະຍອຍກັບ ມີຫຼາຍຄົນທີ່ເຮັດໜ້າແປກໃຈທີ່ເຫັນຂ້ອຍເຈ່ຍມົດ ແຕ່ບາງຄົນເຂົາເຈົ້າກໍ່ລື້ງຕາແລ້ວທີ່ເຫັນຂ້ອຍກັບມົດໄປນຳກັນ ໂຕຕິດກັນຕະລອດ

     “ ອ້າວ ! ສິດຄຶໄດ້ເຈ່ຍກັນມາຈັ່ງຊັ້ນ “ ອ້າຍໄຊໄທບ້ານຮ້ອງຖາມຂະນະລາວຂີ່ລົດຖີບ ພ້ອມກັບລູກສາວ 5 ປີ ທີ່ຊ້ອນຢູ່ທາງຫຼັງ

     “ ເພີ່ນນອນຫຼັບປຸກຈັ່ງໃດກໍ່ບໍ່ຕື່ນ “

     “ ເອົາລົດຖີບອ້າຍເມືອກ່ອນເບາະອ້າຍຊິຮອດເຮືອນແລ້ວ ມື້ອື່ນຈື່ງເອົາມາສົ່ງ “

     “ ບໍ່ເປັນຫຍັງອ້າຍໄຊ ເຮົາບໍ່ໜັກດອກດຽວກະຮອດບ້ານແລ້ວ “

     “ ເອີ້ຄັນຊັ່ນກະລະວັງແດ່ ຢ່າໃຫ້ໝາໄລ່ເດີ້ ດຽວຊິແລ່ນບໍ່ທັນ “

     “ ຂອບໃຈອ້າຍ “

     ທີ່ຂ້ອຍປະຕິເສດກໍ່ຍ້ອນຂ້ອຍຢາກຢູ່ໃກ້ມົດແບບນີ້ດົນໆ ຖ້າຂ້ອຍເອົາລົດຖີບມາກະຮອດເຮືອນໄວ ເວລາທີ່ມີຄວາມສຸກແບບນິແມ່ນໃຜກໍ່ບໍ່ຢາກໃຫ້ມັນຜ່ານໄປບໍ່ແມ່ນຫວາ 

     ແລະ ຂ້ອຍກໍ່ຍ່າງມາຮອດໜ້າບ້ານມົດ ແສງໄຟຢູ່ເຮືອນຊັ້ນລຸ່ມຍັງເປີດຢູ່ ສົງໄສແມ່ຢູ່ຖ້າໄຂປະຕູເອົາມົດ ເພາະແມ່ຄົງບໍ່ຢາກໃຫ້ມົດປີນຮົ້ວເຂົ້າໄປຄືຜ່ານມາ . ຂ້ອຍເດ່ມືໄປບີບ ອ໊ອດ ກ່ອນທີ່ແມ່ຂອງມົດຈະອອກມາໄຂປະຕູ.

     “ ຄືແບກກັນມາຈັ່ງຊັ້ນລະລູກ “ ແມ່ຂອງມົດຟ້າວແລ່ນອອກມາແລະຖາມໃນທັນທີທັນໃດທີ່ເຫັນກ່ອນຈະໄຂປະຕູໃຫ້

     “ ມົດລາວນອນຫຼັບບໍ່ໄດ້ເປັນຫຍັງດອກແມ່ “

     “ ເອົາມົດລົງກ່ອນກະໄດ້ລູກດຽວແມ່ພາເຂົ້າໄປໃນເຮືອນເອງ “

    “ ບໍ່ເປັນຫຍັງແມ່ “ ວ່າແລ້ວຂ້ອຍກໍ່ແບກມົດເຂົ້າໄປໃນເຮືອນກ່ອນຈະວາງລົງໄວ້ໂຊຟາໃນເຮືອນ

     “ ຂອບໃຈລູກດຽວແມ່ຊິປຸກຂື້ນໄປນອນເອງ , ມັນເດິກລະລຸກກະເມືອນອນພັກຜ່ອນສາ “

     “ ໂດຍ ຊັ່ນລຸກກັບກ່ອນເດີ້ “      ຂ້ອຍຍົກມືລາກ່ອນຈະຫັນຫຼັງອອກໄປ

     “ ຂອບໃຈຫຼາຍໆເດີ້ສິດ “ ແມ່ວ່າ

     

     “ ໂດຍ “

     ໂຄດແຕ່ປວດຫຼັງເລີຍ ແຕ່ມັນກໍ່ຄຸ້ມຄ່າທີ່ຂ້ອຍໄດ້ເຮັດເພື່ອຄົນທີ່ຂ້ອຍຮັກ ເຖິງເຂົາຈະບໍ່ຮັບຮູ້ກໍ່ຕາມ , ແຕ່ວ່າຢູ່ເຮືອນຂ້ອຍຄືບໍ່ມີໃຜຖ້າໄຂປະຕູໃຫ້ແດ່ຫວ໋ະ , ສົງໄສຂ້ອຍຄົງຕ້ອງໄດ້ປີນຮົ້ວຕາມເຄີຍ .

     

*******************************************************************************

ເນື່ອງຈາກວ່າຜູ້ຂຽນເປັນຜູ້ຍິງບາງອາລົມຈື່ງບໍ່ສາມາດເຂົ້າຖຶງຈິດໃຈຜູ້ຊາຍໄດ້ດີ ຈື່ງຂໍອະໄພຫຼາຍໆ