ຄວາມຮັກທີ່ຊ້ອນຢູ່

ลำดับตอนที่ #11 : ສັບສົນ

     “ ມົດຄືຕື່ນໄວແທ້ລູກ “     ແມ່ທ້ວງຕັ້ງແຕ່ເຫັນຂ້ອຍຍ່າງລົງຂັ້ນໃດມາ

     “ ກະຕື່ນເຊົ້າຈັກມື້ໜື່ງຊິເປັນຫຍັງ “     ຂ້ອຍຕອບແລ້ວຍ່າງໄປນັ່ງຂ້າງໆພໍ່

     “ ພໍດີກິນເຂົ້າພ້ອມກັນເລີຍ ພໍ່ກະຊິອອກໄປເຮັດວຽກ “     ພໍ່ເວົ້າກ່ອນທີ່ເຮົາສາມຄົນຈະລົງມືກິນເຂົ້າ

' You know i miss you '

     ຂ້ອຍກົດຮັບໂທລະສັບທີ່ວາງໄວ້ໜ້າໂຕະ ໂດຍທີ່ຍັງບໍ່ທັນໄດ້ເບີ່ງຊ້ຳວ່າແມ່ນໃຜໂທມາ

     “ ໂຫຼ “

    ' ມົດຕື່ນລະຫວາ '    ຂ້ອຍເອົາໂທລະສັບອອກມາເບີ່ງເບີປາຍສາຍຈື່ງຮູ້ວ່າແມ່ນຊາຍໂທມາ

     “ແມ່ນ ຊາຍມີຫຍັງບໍ່ໂທມາແຕ່ເຊົ້າ“

    ' ຊາຍວ່າຊິເຂົ້າໄປຮັບມົດ'

    “ ຊາຍບໍ່ມາກະໄດ້ປົກກະຕິມົດກະໄປເອງ“

    ' ເຮົາເປັນແຟນກັນໃດ , ອີກ 15 ນາທີຊາຍໄປຮັບລະອອກມາໜ້າບ້ານເດີ້ '

     “ ຊາຍ !...“

     ຕູ໋ດໆໆໆໆໆໆໆໆໆໆໆໆໆໆໆໆໆ

     ຍັງບໍ່ທັນວ່າຫຍັງຊ້ຳຊາຍກໍ່ວາງສາຍໃສ່ແລ້ວ ຂ້ອຍກຳລັງຈະກົດໂທລະສັບໂທກັບຫາຊາຍ

     “ ກິນເຂົ້າກ່ອນມົດລະຈື່ງຫຼິ້ນໂທລະສັບ “     ພໍ່ເວົ້າກ່ອນທີ່ຈະສົ່ງສາຍຕາບອກວ່າ ' ວາງໂທລະສັບລົງ '

     ເຮັດຈັ່ງໃດດີລະ ຖ້າສິດມາສິດຊິບໍ່ຄຽດຫວາຖ້າໄປກັບຊາຍ , ເອີ່ ! ລະເຮົາຊິສົນໃຈເຮັດຫຍັງ ຊາຍເປັນແຟນເຮົາກະຕ້ອງມາຮັບເຮົາຕົວ

      ແຕ່ສິດກັບເຮົາກໍ່ເປັນໝູ່ກັນມາຫຼາຍປີ ແຖມໄປມາໂຮງຮຽນກະໄປມານຳກັນ  , ແຕ່ໄປກັບຊາຍມື້ດຽວຄືຊິບໍ່ເປັນຫຍັງດອກ

     ແຕ່ຊາຍຫາກໍ່ສາລະພາບກັບເຮົາເອງວ່າຄິດກັບເຮົາຫຼາຍກວ່າໝູ່ , ແຕ່ເຮົາຄິດວ່າສິດເປັນໝູ່ໃດ

     ແທ້ຫວາ ! ເຮົາຄິດກັບສິດແຕ່ໝູ່ເທົ່ານັ້ນຫວາ  , ຄົນທີ່ເຮົາມັກແມ່ນຊາຍບໍ່ແມ່ນສິດ ຊາຍມາຮັບເຮົາຄວນຊິດີໃຈ 

ລະສະໝອງຊິມາຖຽງກັນເຮັດຫຍັງນິຢາກບ້າຕາຍ

     ປີ໋ດໆ

     “ ມົດແມ່ນລົດໃຜມາບີບແຈຢູ່ໜ້າບ້ານ “      ພໍ່ຖາມ ຂ້ອຍຈື່ງຫຼຽວໄປທາງປະຕູປ່ອງຢ້ຽມເຫັນລົດຊາຍຈອດຢູ່

     “ ໝູ່ເຮົາເອງພໍ່ , ດຽວເຮົາຕ້ອງໄປໂຮງຮຽນກ່ອນເດີ້ “     ຂ້ອຍລຸກໄປຈັບເອົາຖົງປື້ມ

     “ ໝູ່ຜູ້ໃດ ລະບໍ່ຖ້າສິດຫວາ “     ພໍ່ຖາມຕໍ່“

     “ ໝູ່ຢູ່ໂຮງຮຽນຫັ່ນລະ ເຮົາຕ້ອງໄປແລ້ວໝູ່ຊິຖ້າດົນ “     ຂ້ອຍກຳລັງຊິແລ່ນອອກໄປ

     “ ບໍ່ຟ້າວໄປ “     ແມ່ຂ້ອຍເວົ້າຂື້ນ

     “ ແມ່ນຜູ້ດຽວກັບຜູ້ທີ່ມາຮັບລູກໄປເບີ່ງໜັງແມ່ນບໍ່ “     ແມ່ຖາມຕໍ່

     “ ໂດຍ “

     “ ຊັ່ນຄືບໍ່ຮ້ອງລາວເຂົ້າມາໃນເຮືອນແມ່ກັບພໍ່ ຈື່ງຊິໄດ້ຮູ້ຈັກ “

     “ ໄວ້ມື້ໜ້າສາແມ່ ດຽວໄປໂຮງຮຽນບໍ່ທັນ “

     “ ຊັ່ນແມ່ຊິຍ່າງໄປສົ່ງ , ແມ່ກະຢາກຮູ້ວ່າແມ່ນໃຜ “     ແມ່ຂ້ອຍຍ່າງນຳໜ້າຂ້ອຍໄປ ຕອນນີ້ຂ້ອຍບໍ່ຮູ້ວ່າແມ່ຈະເຮັດຫຍັງ

     ຂ້ອຍຍ່າງອອກມາຈາກເຮືອນຕາມຫຼັງແມ່ ພໍດີເຫັນສິດຍ່າງມາຮອດໜ້າບ້ານ ແລະ ກຳລັງຢືນລົມກັນກັບຊາຍ

     “ ມົດລາວຍ່າງໄປເອງໄດ້ “     ຂ້ອຍໄດ້ຍິນສິດເວົ້າ

     “ ກະຮູ້ ແຕ່ມື້ນີ້ມົດຕ້ອງໄປກັບຊາຍ, ເພາະຊາຍມາຮັບມົດແລ້ວ, ສ່ວນເພີ່ນກໍ່ໄປໂຮງຮຽນກ່ອນໂລດເຂົາຖ້າມົດຢູ່ “     ຊາຍວ່າ

     “ ສະບາຍດີແມ່ “     ຊາຍຫັນມາສະບາຍດີແມ່ຂ້ອຍ

     “ ອື່ມ​! ສະບາຍດີ ມາຮັບມົດຫວາ “     ແມ່ຖາມ

     “ ໂດຍ “     

     “ ເປັນໝູ່ຫ້ອງດຽວກັບສິດກັບມົດຫວາ “     ແມ່ຖາມຕໍ່

     “ ເຮົາເປັນແຟນມົດ “

     “ 0_0' “     ຊາຍເວົ້າແນວນິເລີຍນະປຶກສາເຂົາກ່ອນບໍ່ , ແມ່ຫັນໜ້າມາທາງຂ້ອຍ

     “ ສົມພໍລະເນາະ “

     “ ສິດເດ່ ຊິໄປຈັ່ງໃດຄັນມົດໄປກັບຊາຍລະ “     ແມ່ມາຖາມຂ້ອຍ

     “ ຊັ່ນເຮົາຍ່າງໄປເອງກະໄດ້ແມ່ “     ສິດບໍ່ຄິດຊິຖາມຂ້ອຍຈັກຄຳວ່າຢາກໄປກັບຊາຍບໍ່

     “ ຄ່ອຍໄປຄ່ອຍມາ  ລະວັງແດ່ເດີ້ລະ “     ແມ່ຫັນມາທາງຂ້ອຍ ກ່ອນຈະເຂົ້າໄປໃນເຮືອນ ຄຳວ່າລະວັງຂອງແມ່ນິບໍ່ມີແຕ່ເລື່ອງຂັບລົດດອກຂ້ອຍຮູ້

     “ ສິດ ຕໍ່ໄປບໍ່ຕ້ອງມາຮັບມົດແລ້ວເດີ້ ເພາະເຂົາຈະເປັນຄົນມາຮັບມາສົ່ງມົດເອງ “     ຊາຍເວົ້າໃຫ້ສິດ

     “ ຊາຍ ແຕ່ສິດເປັນໝູ່ມົດໃດ “     ຂ້ອຍເວົ້າຂັດຂື້ນ

     “ ແຕ່ມົດເປັນແຟນຊາຍ “     ຊາຍຫັນມາເບີ່ງໜ້າຂ້ອຍ

     “ ສິດຄົງເຂົ້າໃຈເພາະຜູ້ຊາຍ ຍ່ອມບໍ່ມັກໃຫ້ໃຜເຂົ້າໃກ້ແຟນໂຕເອງ “     

     “ ອື່ມ ! ເຂົາໄປກ່ອນເດີ້ມົດ ແລ້ວເຈີກັນ “     ສິດຍ່າງຜ່ານຂ້ອຍໄປ ຮູ້ສຶກເສຍໃຈຈັ່ງໃດບຸ

     “ ມົດ “     ຊາຍຢືນໝວກກັນນ໋ອກໃຫ້ຂ້ອຍ ກ່ອນຂ້ອຍຈະຈັບເອົາແລ້ວຊ້ອນທ້າຍລົດຊາຍ ຂີ່ກາຍສິດໄປ

     2 ອາທິດເຕັມໆທີ່ຊາຍທຽວໄປຮັບໄປສົ່ງຂ້ອຍ ເສົາ- ອາທິດກໍ່ພາໄປຫຼິ້ນຈົນຕອນນີ້ເສັງປິດພາກຮຽນໜື່ງໄປແລ້ວ ແຕ່ຊາຍກໍ່ທຽວໂທມາຫາ , ມັນກໍ່ໜ້າຈະດີແລ້ວບໍ່ແມ່ນຫວາ ແຕ່ຂ້ອຍພັດບໍ່ມີຄວາມສຸກເລີຍ, ຂ້ອຍເຈີສິດ ແຕ່ຕອນຮຽນ ແລະ ຕອນຄ່ຳໆຖ້າສິດອອກມາໜ້າບ້ານ . ຂ້ອຍຢາກໄປຫຼິ້ນບ່ອນທີ່ສິດພາໄປ ໄປສວນປ້າແກ້ວ, ໄປເລາະຊື້ເຂົ້າໜົມ, ໄປຍ່າງຫຼິ້ນ ແຕ່ຊາຍກັບພາໄປແຕ່ກິນເຂົ້າໃນຫ້າງ, ເບີ່ງໜັງຟັງເພັງ ຮ້ອງຄາລາໂອເກະ, ກັບມາບ້ານເດີກກະຖືກພໍ່ຮ້າຍອີກ , ຫຼັງຈາກພັກຮຽນຂ້ອຍບໍ່ເຫັນໜ້າສິດມາ 3 ມື້ແລ້ວ, ຊິໂທຫາກະບໍ່ກ້າໂທຈັ່ງໃດບຸ . ມື້ນິຊາຍພາຂ້ອຍມາເບີ່ງໜັງອີກແລ້ວຊິເບີ່ງຫຍັງທຸກອາທິດຊື້ແຜ່ນໄປເບີ່ງຍັງຄຸ້ມຄ່າກ່ອນອອກບ້ານມານິເປືອງແຕ່ເງິນ ແຖມແຕ່ລະເທື່ອກະຊື້ຊຸດບ້າຊຸດບໍຫຍັງບຸໃຫ້ຂ້ອຍນຸ່ງ ຂ້ອຍບໍ່ແມ່ນໄໝໃດຈື່ງຊຶນຸ່ງກະໂປງແລ້ວອອກມາງາມ ແຮງນຸ່ງແບບຊິ ແຮງເຕ້ຍໄປອີກ ເວນກຳ.

     “ ມົດບໍ່ມ່ວນຫວາ “     ຊາຍຫັນໜ້າມາຖາມຂ້ອຍຂະນະທີ່ເບີ່ງໜັງຢູ່

     “ ມ່ວນຕົວະ “     ຂ້ອຍກະວ່າໄປຊັ້ນລະ

     “ ມົດມີຄວາມສຸກບໍ່ເວລາຢູ່ກັບຊາຍ “

     ' ບໍ່ເລີຍບໍ່ມີ '

     “ ອື່ມ “     ຂ້ອຍຕອບສັ້ນໆ ແລະ ຍີ້ມໃຫ້ຊາຍໄປ

     ແຕ່ແລ້ວຊາຍກໍ່ຈັບມືຂ້ອຍໄວ້ ເທື່ອນີ້ເປັນຄັ້ງທີ 2 ແຕ່ຂ້ອຍບໍ່ຕົກໃຈຫຼືຕື່ນເຕັ້ນຫຍັງເລີຍ

     “ ຊາຍຮັກມົດໃດ “

     

     ມັນເປັນຄັ້ງແລກທີ່ຊາຍບອກຮັກ ແຕ່ຂ້ອຍກັບບໍ່ຮູ້ສຶກຫຍັງເລີຍຕ່າງຈາກຕອນທີ່ສິດບອກຂ້ອຍ

     “ ອື່ມ ! ເຮົາເບີ່ງໜັງຕໍ່ເທາະ “     ຂ້ອຍຖອດມືອອກຈາດມືຊາຍທີ່ຈັບມືຂ້ອຍໄວ້

     ທຸກຄັ້ງທີ່ມາເບີ່ງໜັງຂ້ອຍຈະຄິດເຖິງພາບທີ່ໄປເບີ່ງໜັງກາງແປນກັບສິດ, ທຸກຄັ້ງທີ່ເຮົາໄປຊື້ເຄື່ອງນຳກັນຂ້ອຍຈະຄິດເຫັນຕອນທີ່ຂ້ອຍໄປຕະຫຼາດກັບສິດ, ຕໍ່ເຄື່ອງກັບສິດ , ເລືອກເສື້ອໃຫ້ສິດ ບໍ່ແມ່ນຖືກຈັບແຕ່ງໂຕແບບນິ , ຊາຍລ້ຽງເຂົ້າຂ້ອຍຄາບໃດຂ້ອຍຈະຄິດເຫັນຕອນທີ່ເຮົາພາກັນຍ່າງເລາະຊື້ແນວກິນກິນໄປນຳທາງ ມີແຕ່ແນວກິນເຕັມມື .

     “ ມົດຫິວເຂົ້າລະຫວາ “ ຊາຍຖາມ

     “ ກະຫິວຢູ່ “

     “ ຊັ່ນເຮົາໄປກິນຫຍັງດີ ກິນພິດຊ້າ, ແໜມ ຫຼື ຂາໄກ່ ຫຼື ມົດຢາກກິນຫຍັງ “

     “ ແລ້ວແຕ່ສິດເທາະມົດກິນໄດ້ໝົດ “      ຊາຍແນມເບີ່ງໜ້າຂ້ອຍ ເປັນຫຍັງຂ້ອຍເຮັດຫຍັງຜິດ

     “ ກີ້ນິ ມົດຮ້ອງຊາຍວ່າສິດຫວາ “

     “ ຫວາ ! ມົດເວົ້າວ່າສິດຫວາ  ສົງໄສລື້ງຢູ່ກັບສິດຫຼາຍເລີຍຫຼົງຊື່ ແຮໆ “

     “ ມົດ “     ຊາຍເຮັດໜ້າຈິງຈັງ

     “ ມົດຮັກຊາຍບໍ່ “ 

     ຂ້ອຍກັບມາຮອດເຮືອນໂດຍທີ່ຍັງບໍ່ທັນໃຫ້ຄຳຕອບຊາຍ, ຂ້ອຍສັບສົນໄປໝົດ ຖາມໃຈໂຕເອງຕະຫຼອດວ່າຂ້ອຍຮັກໃຜກັນແທ້ , ຂ້ອຍກຳລັງຈະເຂົ້າໄປໃນເຮືອນພໍດີເຫັນສອນຢືນລົມໂທລະສັບຢູ່ໜ້າບ້ານ

     “ ສອນ “     ຂ້ອຍຮ້ອງໃສ່ສອນ

     “ ດຽວໂທກັບດີ້ “     ສອນວາງສາຍແລ້ວຫັນໜ້າມາຫາຂ້ອຍ

     “ ເອື້ອຍມົດ ຫ່າງຫາຍກັນໄປດົນເປັນຈັ່ງໃດ “     

     “ ກະບໍ່ຈັ່ງໃດດອກ ສິດໄປໃສ 2-3 ມື້ນິເອື້ອຍຄືບໍ່ເຫັນ “

     “ ອ້າວ​! ອ້າຍສິດບໍ່ໄດ້ບອກເອື້ອຍມົດຫວາ ວ່າລາວໄປຊ່ວຍວຽກຢູ່ຄ້າຍມວຍລຸງໄຊຢູ່ສະຫວັນນະເຂດ “

     “ ລາວໄປມື້ໃດຄືບໍ່ບອກເອື້ອຍແດ່ “

     “ ລາວໄປແຕ່ມື້ເສັງແລ້ວພຸ້ນລະ, ໄປຮັກສາແຜໃຈ ຍ້ອນເອື້ອຍມົດຫັ່ນລະເຮັດໃຫ້ອ້າຍເຮົາອົກຫັກ “

     “ ແລ້ວລາວຊິກັບມາມື້ໃດ “

     “ ສົງໃສແມ່ນເຂົ້າຮຽນພຸ້ນຕິ , ເອື້ອຍມົດມີຫຍັງຮ້າຍແຮງບໍ່ນິ “

     “ ບໍ່ມີຫຍັງດອກດຽວເອື້ອຍໂທຫາລາວເອງ “

     “ ໂທຍາກໃດ ເພາະວ່າຢູ່ເຂດນອກ , ເອື້ອຍມົດນະມີແຟນລະຖີ້ມໃຫ້ອ້າຍເຮົາອົກຮັກບໍ່ກິນເຂົ້າກິນນ້ຳເປັນອາທິດ ພໍ່ກັບແມ່ ເລີຍສົ່ງໃຫ້ລາວໄປຊ່ວຍວຽກລຸງເທື່ອອາການດີຂື້ນ, ພໍ່ກັບແມ່ວ່າຖ້າຫາກອາການຍັງບໍ່ດີກະຂິເຮັດເລື່ອງຍ້າຍອ້າຍສິດໄປຮຽນຢູ່ພຸ້ນເລີຍ “

     “ ເອື້ອຍຂໍໂທດ “     ຂ້ອຍຫັນຫຼັງໃຫ້ສອນກ່ອນຈະກັບເຂົ້າໄປໃນເຮືອນ

     ຂ້ອຍອັດປະຕູຫ້ອງແລ້ວຖິ້ມໂຕລົງນັ່ງອິງປະຕູ ນ້ຳຕາຂ້ອຍໄຫຼອອກມາເອງໂດຍບໍ່ຮູ້ໂຕ ແລະ ຄຳຖາມທີ່ຢູ່ໃນໃຈມັນກໍ່ມີຄຳຕອບແລ້ວ

     “ ສິດ ເພີ່ນກັບມາໄດ້ບໍ່ ຮູ້ບໍ່ວ່າໃນມື້ນີ້ເຂົາຮູ້ແລ້ວວ່າ ເຂົາຮັກເພີ່ນ “